Inwoners na MRK oor huise op mynhoop

Written by  Tuesday, 11 November 2014 14:54
Rate this item
(0 votes)

1800 mense wat sedert 1997 op 'n radioaktiewe mynhoop buite Krugersdorp woon, het die hulp van die Menseregtekommissie (MRK) ingeroep om Mogale City te oorreed om 'n ander blyplek vir hulle te kry.

Die mense, almal plakkers­gesinne wat op die Tudorskag woon, vra Mogale City al die afgelope sewe jaar om hulle te help om van dié radioaktiewe mynhoop weg te skuif.

Mariette Liefferink, direkteur van die Federasie vir 'n Volhoubare Omgewing, het gese mense se versoeke het tot dusver op dowe ore geval en daarom is die MRK se hulp ingeroep.

Luidens 'n onlangse verslag van die Raad vir Geowetenskappe en die Noordwes-Universiteit se sentrum vir toegepaste bestralingswetenskappe en tegnologie is die radioaktiwiteit waaraan die mense by die Tudorskag blootgestel word tot 13 keer hoer as dit wat in die natuurlike omgewing voorkom.

Die verslag wys daarop dat die mense so gou moontlik verskuif moet word. Luidens die verslag behoort mense wat met dié hoeveelheid radioaktiwiteit in aanraking kom, loodpakke te dra om hulle teen die bestraling te beskerm.

David Letsie, burgemeesterskomiteelid vir huisvesting in Mogale City, het gister gesê die plaaslike owerheid het onlangs R10 miljoen begroot om vir die mense ander blyplek te kry. Omgewingsimpakstudies word tans gedoen op die grond wat vir hervestiging oorweeg word, het Letsie gese.

Die grond is in die Kagiso-omgewing. "Ons wil nie in hierdie stadium die presiese ligging van die grond bekend maak nie om te keer dat die mense uit hul eie daar begin plak."

Hy het gese dit is 'nn baie “netelige saak”, maar die plaaslike owerheid sal die mense begin hervestig sodra die studies voltooi is en Mogale City goedkeuring kry om water- en rioolinfrastruktuur daar aan te le. "Ons praat gereeld met die mense om hul gemoedere te kalmeer."